上星期仲係局部封關時，我老公話好想出去行下，於是就去咗行山。
行咗差唔多成個鐘去到山徑，諗住行上山放鬆下心情，點知……
全 個 山 都 係 人 ！
個 個 都 除 晒 口 罩 ！
.
係，我明戴住口罩會令含氧量下降，做運動會好辛苦……
但係每三米山路都有20-30個人喺度喎！
一家大細有老有嫩喎！
仲要有好多講普通話同鄉音人士，
唔知係咪啱啱過完年返嚟喎！
佢哋嘅謎樣安全感究竟邊度嚟？
以呢個密度，求其一個以為自己冇事嘅隱形病人打個乞嚏，
已經可以沾上30人。
呢30人又拖下手抱下細路交換下食物……
真係一嘢KO 300人不是夢！
.
唔好講笑我真係勁驚，全程唔敢除口罩，
就算要飲水都去啲方圓5米冇人嘅位，
開水樽前後仲要用消毒液洗手三四次，
喺有人接近之前就要極速戴返好口罩，
真係辛苦過做賊。
好啦返到屋企，用1:99印鞋底之餘，仲要用酒精抹袋抹行山仗……
咁樣計一計，消耗資源實在太多，
成本非常高昂。
.
今個星期老公又話想去行山……
不了，想運動嘅話，我匿喺屋企做HIIT好過。
=
FB｜紙言｜方格子｜matters︰@又曦
IG｜medium︰@morning_rays
#愛情 #夫妻 #隔離 #武漢肺炎 #抗疫
#行山 #運動 #生活 #夫妻生活 #同居
#香港
#廣東話
Search